Ministri i Punëve të Jashtme të Maqedonisë së Veriut, Bujar Osmani, ka deklaruar në emër të Qeverisë, se Maqedonia e Veriut është dhe do të jetë në çdo rrethanë gardian i interesit të Kosovës.
“Ne do të jemi gardian i interesit të Kosovës, nëse shohim se ka një dëm për Kosovën, për pavarësinë e saj, për njohjen e ndërsjellë, për rrumbullakimin e shtetformësisë. Ne jemi gardianë të Kosovës”, ka deklaruar Osmani.
Osmani kritikohet shpesh nga opozita dhe një pjesë e opinionistëve maqedonas për aktivitetin e tij diplomatik të cilin e shtrin edhe për çështjet e hapura të Republikës së Kosovës në rrethana ndërkombëtare.
Edhe si zëvendëskryeministër për Çështje Evropiane Osmani sulmohej për të njëjtën arsye. Kujtojmë se Osmani atëherë nuk kishte marrë pjesë në një Konferencë të organizuar në Bosnjë dhe Hercegovinë, për arsye se aty nuk ishte ftuar Kosova.
Tani, si kryediplomat i Maqedonisë së Veriut, Bujar Osmani, kur mori pjesë në seancën e Komitetit të Ministrave të Këshillit të Evropës në Torino në maj të këtij viti, kërkoi që të pranohet Republika e Kosovës në Këshillin e Evropës.
“Përderisa Këshilli i Evropës përjashtoi vendin (Rusinë) i cili i shkeli vlerat themelore të organizatës, duhet ta mbështesin kërkesën e Kosovës si shtet që i pasqyron gjithë vlerat e kësaj organizate”, kishte thënë i pari i Diplomacisë së Maqedonisë së Veriut.
Edhe në raport me qëndrimin e Kosovës ndaj Ballkanit të Hapur si iniciativë rajonale, kryediplomati Osmani ka qenë i prerë.
“Nëse e shohim një element se po i bëhet dëm Kosovës, ja unë po e marr përgjegjësinë, po them në emër të Qeverisë, se Maqedonia nuk do të jetë pjesë e iniciativës”, ka deklaruar ai.
Po ashtu, javën e kaluar, teksa ka komentuar mbi zhvillimet e fundit në Veri të Mitrovicës, ka thënë se po e përcjell me vëmendje situatën.
Me anë të një postimi në llogarinë e tij në Twitter, Osmani ka theksuar se Maqedonia e Veriut i inkurajon të dy vendet fqinje që të veprojnë në përputhje me vlerat evropiane të fqinjësisë së mirë.