Ministri i Kulturës, Rinisë dhe Sportit, Hajrullah Çeku, ka reaguar në lidhje me letrën e dërguar në UEFA nga Serbia, ku thuhet se autoritetet Kosovare, po u bëjnë trajtim “jonjerëzor”, futbollistëve serbë në Kosovë.
Sipas Çekut, pretendimet e tilla si dhe të tjerat ku thuhet se Kosova nuk po u lejon sportistëve serbë të ushtrohen apo organizojnë lojëra lokale, nuk janë të vërteta dhe se me të po tentohet të shtrembërohet realiteti.
“Letra e Federatës së Futbollit të Serbisë drejtuar Presidentit të UEFA-së, përveç shtrembërimit të realitetit, përdor edhe gjuhë fyese”, ka shkruar Çeku.
Sipas tij, FFK vazhdimisht “i kanë ftuar klubet sportive të komunitetit serb në Republikën e Kosovës që të bëhen pjesë e sistemit legjitim sportiv në shtetin tonë”, por ata nuk kanë pranuar.
Çeku, po ashtu, tha se Serbia e ka shkelur marrëveshjen e fundit në Kosovë, pikën ku thuhet se palët janë pajtuar të mos e përfaqësojnë njëra-tjetrën ndërkombëtarisht.
“Për vite, federatat e sportit të Serbisë kanë organizuar aktivitet paralel dhe ilegal si pjesë e kampionateve të tyre zyrtare në zona të caktuara brenda territorit të Republikës së Kosovës. Marrëveshja e fundit mes Kosovës dhe Serbisë, e ndërmjetësuar nga BE, veç tjerash, parasheh marrëdhënie të barabarta dhe të fqinjësisë së mirë. Palët gjithashtu janë pajtuar të mos e përfaqësojnë njëra-tjetrën ndërkombëtarisht”, ka thënë ai.
Ministri i Kulturës është shprehur se Kosova është vend i sportit, por nuk do të tolerohen aktivitetet ilegale që e shkelin rendin kushtetues e ligjor si dhe kartat evropiane e botërore të sportit.
Ai u ka bërë thirrje të gjitha klubeve të sportit të bëhen pjesë e sistemit legjitim të sportit në Kosovë.