E mërkura edhe këtë javë në kuadër të emisionit “Jeto” me Xheneta Asllanin, solli bisedën me profesionistin e shëndetit mendor.
I ftuar në studion e Radio Dukagjinit këtë javë ishte psikologu Dorian Krasniqi, i cili diskutoi për manipulimin dhe personat manipulues.
Ai deklaroi se manipulimi është një formë e ndikimit të mendimit të personit, mënyrës se si ai mendon, vepron dhe jeton, për qëllime zakonisht të këqija, ose për qëllime të përfitimit të manipuluesit.
Manipuluesi mund të përdorë teknika të ndryshme, si sharmin, indoktrinimi si formë e mbjelljes së mendimit, teknika e metoda të ndryshme që të kihet sa më shumë ndikim tek personi tjetër në të menduarit e tij, dhe pastaj edhe në funksionimin e tij, në favorin e manipuluesit.
Sipas psikologut, personi që është i manipuluar e ka shumë të vështirë të largohet nga kjo ideologji, pasi edhe personat që tentojnë t’i ndihmojnë dhe ta largojnë nga ajo gjëndje, i duket sikur po e sulmojnë atë. Dhe zakonisht, shumica e personave e mësojnë shumë vonë që kanë qenë të manipuluar në forma të ndryshme, dhe jo doemos vetëm menipulime ekstreme.
Krasniqi theksoi se në disa raste manipulatorët përdorin teknika të ndryshme për ta arritur atë që dëshirojnë, e në raste të tjera ka persona që nuk e bëjnë këtë me qëllim, por ka teknika që u kanë funksionuar në të kaluarën për të arritur atë që dojnë dhe tani u kanë mbetur shprehi.