Nënkryetarja e Partisë Demokratike të Kosovës, Vlora Çitaku, ka thënë se në të kaluarën në takime të rëndësishme ku ishte SHBA-ja, Kosova ishte palë, e jo temë.
Kështu ka thënë ajo në një postim në llogarinë e saj në Facebook, teksa ka shtuar se tanimë qëndron e kundërta. Sipas saj, Kosova është tema, ndërsa Serbia palë.
“Dikur, në takime të rëndësishme ku ishte SHBA-ja, Kosova ishte palë, e jo temë. Sot, palë është Serbia e temë Kosova, ndërsa krerët e institucioneve tona sillen korridoreve për të shtrënguar simbolikisht ndonjë dorë, sikur të ishin turistë të interesuar për fotografi e jo përfaqësues të një shteti që i duhet përkrahja e SHBA-së”, shkroi ajo.
Teksa ka kritikuar qeverinë aktuale, Çitaku tha se me këtë qeverisje janë mbyllur dyert që dikur Kosova i kishte të hapura.
“Me liderët e sotëm të institucioneve, jo vetëm që s’janë hapur dyer të reja, por kanë filluar të mbyllën edhe dyert që Kosova i kishte të hapura”, shtoi ajo.