Nënkryetarja e Partisë Demokratike të Kosovës(PDK), të enjten e 26 majit, Vlora Çitaku ka thënë se është e paprecedentë që kryeministri Kurti tash e tri javë gjendet jashtë Kosovës.
Përmes një postimi në Facebook, Çitaku ka shkruar se vizita e tij e fundit në ShBA ishte studimore.
“E paprecedentë dhe tërësisht e papërgjegjëshme që Kryeministri në detyrë tash e tri javë është jashtë Kosovës”, ka shkruar Çitaku.
Ndër të tjera ajo ka shtuar se “Sot Kurti, e paska vizituar një fabrikë të çokolladave në Zvicër, e paska bërë shqiponjën me studentët shqiptarë atje.”
Sipas Çitakut, në Kosovë inflacioni ka kaluar 11%, ndërsa siç thotë ajo, bordi i AKP-së, i zgjedhur nga Kurti, sot e paska shpallur valën e re të privatizimeve.
Ndryshe, pas përfundimit të vizitës së tij në ShBA të nisur me gjashtë maj, kryeministri Kurti tashmë po qëndron për vizitë zyrtare në Zvicër që nga dita e hënë e 23 majit.