Ish-kryetarja e Komisionit Qendror të Zgjedhjeve, Valdete Daka, e ka cilësuar si të paarsyeshme vonesën në proceset politike për krijimin e institucioneve të reja në Kosovë.
Daka ka thënë se vendi ka humbur shumë kohë për shkak të përsëritjes së proceseve zgjedhore dhe zvarritjes së marrëveshjeve politike.
“Gjithsesi është e paarsyeshme kjo vonesë, sepse Kosova i ka humbur gati dy vite në këto pritje dhe zgjedhje që janë duke u përsëritur vazhdimisht. Natyrisht, çdo ditë është e vlefshme për Kosovën”, ka deklaruar Daka.
Ajo ka komentuar edhe afatin e dhënë nga U.D Albulena Haxhiu, për dialogim mes partive politike, duke thënë se deri tani nuk është parë ndonjë përparim apo afrim i qëndrimeve.
“Pavarësisht se z. Haxhiu deklaroi se u ka dhënë kohë partive politike për dialogim, nuk po shohim ndonjë dialog apo përfundim të ndonjë marrëveshjeje”, është shprehur ajo.
Sipas Dakës, deklaratat e partive politike nuk tregojnë gatishmëri për bashkëpunim, duke përmendur qëndrimet e LDK-së dhe PDK-së ndaj mundësisë së një marrëveshjeje me Lëvizjen Vetëvendosje.
“Nuk shoh ndonjë arsye pse është dhënë kjo kohë, përveç faktit që VV-ja po blen kohë”, ka thënë Daka.
Ajo ka vlerësuar se zvarritja e procesit politik po e dëmton funksionimin institucional dhe interesat e vendit.
Daka ka komentuar edhe qëndrimin e kryetarit të LDK-së, Lumir Abdixhiku, ndaj mundësisë së bashkëpunimit me Lëvizjen Vetëvendosje, duke thënë se afrimi mes dy subjekteve politike ka qenë i madh dhe se ka ekzistuar mundësia për një marrëveshje koalicioni.
Sipas saj, Abdixhiku nuk mund të llogarisë në mbështetjen e të gjitha votave brenda LDK-së për një marrëveshje me VV-në, pasi disa deputetë kanë bërë të ditur se nuk do ta mbështesnin një koalicion të tillë. Daka vlerëson se tashmë mbetet të shihet edhe rezultati i Kuvendit të LDK-së dhe vendimet që do të merren pas tij.
Daka ka deklaruar se Lëvizja Vetëvendosje po e shfrytëzon këtë periudhë për të pritur zhvillimet politike, veçanërisht ato brenda LDK-së, si dhe ndonjë lëvizje të mundshme nga partitë e tjera.
“Po blen kohën se çka do të ndodhë me zhvillimet brenda LDK-së. Pret ndoshta ndonjë lëvizje brenda PDK-së, pavarësisht që nuk ka ndodhur asnjë sinjal se ka ndonjë afrim apo marrëveshje”, ka thënë Daka.
Ajo ka vlerësuar se Kuvendi i jashtëzakonshëm i LDK-së mund të ndikojë në zhvillimet e ardhshme politike, duke thënë se mund të kërkohet një përgjegjës për një dështim të mundshëm të marrëveshjes.
“Presin Kuvendin e jashtëzakonshëm të LDK-së, për dobësimin e saj dhe për të gjetur një fajtor që për shkak të LDK-së do të shkojmë përsëri në zgjedhje. Po, do të shkojmë në zgjedhje”, është shprehur Daka.