Deputetja e Partisë Demokratike të Kosovës (PDK), Blerta Deliu-Kodra, ka thënë se dy vjet të presidentes Vjosa Osmani në Presidencë simbolizohen me “servilizëm ndaj Albin Kurtit”.
Përmes një postimi në Facebook, Deliu-Kodra e ka kritikuar të parën e vendit se ka reduktuar rolin e saj në notere të kryeministrit Kurti, dhe, sipas saj, në këto dy vjet, Osmani nuk ka ndonjë rezultat konkret në kompetencat e saj kushtetuese.
Ajo madje e ka kritikuar Osmanin edhe për sulme ndaj ish-krerëve të UÇK-së, për të cilët, ka filluar procesi gjyqësor në Hagë, të hënën e tre prillit, që sipas saj, tashmë nuk kanë mundësi të kundërpërgjigjen.
“Një presidente e cila e ka reduktuar rolin e saj në notere të kryeministrit, nuk mund të flasë për vullnet qytetar dhe për mbrojte të interesit të qytetarëve të Republikës së Kosovës. Asnjë njohje, asnjë anëtarësim i Kosovës në organizata ndërkombëtare, asnjë angazhim konsistent. Asnjë fuqizim të subjektivitetit tonë ndërkombëtar. Mbetet e njohur për sulmet ndaj oponentëve politikë, të cilët sot nuk kanë mundësi të kundërpërgjigjen, sepse padrejtësisht gjykohen për luftën e UÇK-së”, ka thënë Deliu-Kodra.
Ndryshe, presidentja e Kosovës, në dyvjetorin e marrjes së mandatit si e para e shtetit, ka thënë se i vetmi udhërrëfyes në çdo punë e veprim të saj është vullneti qytetar dhe interesi i Republikës së Kosovës.
Kështu ka shkruar ajo në rrjetin social Facebook, ku ka shtuar se vullneti qytetar dhe interesi i Kosovës do të mbeten udhërrëfyes deri në fund të mandatit si presidente.
“Dy vite si Presidente e juaja! Si gjithnjë, i vetmi udhërrëfyes në çdo punë e veprim timin është vullneti qytetar dhe interesi i Republikës së Kosovës. Kështu do të jetë deri në fund të mandatit! Faleminderit përjetësisht për besimin”, ka shkruar Osmani në Facebook.