Deputetët e opozitës, respektivisht anëtarët e Komisionit për Arsim, kanë kërkuar seancë të jashtëzakonshme në lidhje me atë që e kanë cilësuar si “dështimin për sigurimin e teksteve shkollore për nxënësit nga klasa e parë deri në klasën e nëntë”.
Deputetja Eliza Hoxha ka thënë se shkollat janë të papërgatitura, kurse nxënësit nuk kanë tekste e as materiale shkollore.
“Shkollat janë të papërgatitura, nxënësit nuk kanë tekste shkollore e materiale mësimore, ndërsa familjet e prindërit janë të braktisur. Mbi 200 mijë nxënësve nuk do t’iu ofrohen në shkolla tekstet falas, ashtu siç e përcakton ligji dhe ashtu siç ka ndodhur për më shumë së një dekadë”, ka thënë ajo.
Seana e Kuvendit, sipas Hoxhës, do të nisë këtë të hënë derisa ka kërkuar nga deputetët t’i ndërpresin pushimet.
Gjendja, sipas saj, është e jashtëzakonshme, pasojat e së cilës, sipas saj, për faj të Qeverisë po i vuajnë nxënësit.