Pas pesë muajsh mungesë, deputetët e Listës e Serbe janë rikthyer të enjten në Kuvendin e Kosovës.
Ata pas nënshkrimit të tyre për pjesëmarrje në seancën plenare kanë zënë vendet në ulëset e tyre.
Mirëpo, pas pak minutash e kanë lëshuar seancën.
Deputetët e rinj të Listës Serbe ishin betuar në mes të nëntorit, kjo pasi të shtunën e 5 nëntorit, përfaqësuesit e Listës Serbe, në takimin me përfaqësuesit serbë të institucioneve të Kosovës kishin vendosur për bojkotimin e institucioneve të Republikës së Kosovës.
Sipas Kushtetutës së Kosovës, mandati i deputetit mbaron ose bëhet i pavlefshëm nëse ai mungon 6 muaj rresht në seancat e Kuvendit.
Deputeti nga radhët e Lëvizjes Vetëvendosje, Dimal Basha, ka reaguar duke thënë se deputetët e Listës Serbe erdhën në Kuvend dhe në seancë sa “për mëditje”, duke shtuar se më me interes do të ishte të qëndronin në seancë kur dihet situata në veri të vendit.