“Kryeministër, a ke treguar sa ke bërë për diasporën e sa vlen diaspora për ty? Diasporën ti e sheh veç si votë dhe monedhë”.
Kështu e ka nisur postimin e saj në Facebook, deputetja e Partisë Demokratike të Kosovës, Ariana Musliu-Shoshi (PDK).
Gjersa e ka pyetur Kyeministrin Kurti sesa ka vlerë diaspora për të, deputetja Musliu-Shoshi ka rikujtuar se Ligji për Diasporën nuk është funksionalizuar akoma, gjë e cila e ka bërë deputeten të reagojë, duke thënë se diaspora është shfrytëzuar.
“Diasporën tanë e ke shfrytëzuar për bartjen e shpenzimeve për vartësit e tu nga Ministria e Punëve të Jashtme për sorollatje të kota, duke mos i sjellë asnjë përfitim Kosovës. Diasporën nuk mund ta joshësh me premtime të kota e oferta boshe! Krejt çfarë duan diaspora nga Ju e nga ne si klasë politike është të punojmë me nder, mençuri e dinjitet për vendlindjen e tyre!”, ka shkruar deputetja.
Kryeministri i Kosovës, Albin Kurti, përmes një video-adresimi u ka bërë thirrje mërgatës kosovare që të aplikojnë në “Programin për Diplomaci Qytetare”.
Të enjten, Kurti ka thënë se mërgata është një nga kontribuesit më të rëndësishëm në vend. Sipas tij, programi i qeverisë do të ofronte mundësi që profesionistët nga mërgata të bëhen pjesë e vendimmarrjes në institucionet e Kosovës.
Ndër të tjera, Kurti ka bërë të ditur se në kuadër të këtij programi do të rekrutohen dhjetë profesionistë të rinj të diasporës në Ministrinë e Punëve të Jashtme dhe Diasporës në një periudhë gjashtëmujore.
Hapen dhjetë pozita të dedikuara për mërgatën në MPJD, Kurti u bën thirrje të aplikojnë