Deputetja e PDK-së, Ganimete Musliu ka thënë se viktima e përfshirë në vrasjen e mbrëmshme që ndodhi në fshatin Baks të Skenderajt, nuk është familjar i saj.
Musliu përmes një postimi në Facebook, ka uruar që tragjedi të tilla të mos ndodhin më askund në Kosovë.
“E tronditur nga tragjedia qe ndodhi mbrëmë në fshatin tim. Fshati Baks gjithmonë është shquar për raporte të mira të banorëve mes veti, prandaj ky rast na ka tronditur të gjithëve pa dallim”, ka shkruar ajo.
Policia e Kosovës, ka dhënë detaje lidhur me ngjarjen e së shtunës në Baks të Skenderajt, ku një përleshje ka përfunduar me përdorimin e armëve të zjarrit, me ç‘rast një person ka humbur jetën dhe dy të tjerë janë plagosur.
Lidhur me rastin policia ka arrestuar një të dyshuar për përfshirjen në këtë rast, Gjithashtu janë bastisur dy lokacione, ku policia ka sekuestruar dy armë.
Në njoftimin e Policisë thuhet se “sot më, 23 korrik 2022, policia në Skenderaj ka pranuar informatën për të shtëna me armë zjarri në fshatin Baks të Skenderajt”.
Me të pranuar informacionin, në vendin e ngjarjes me urgjencë kanë dalë të gjitha njësitë kompetente policore.
“Nga informatat e para nga vendi i ngjarjes është kuptuar se në rast ishin përfshirë disa persona, ku si pasojë e të shtënave me armë zjarri tre persona ishin të plagosur. Dy persona ishin dërguar për tretman mjekësor në QKMF-Skenderaj, ku njëri prej tyre si pasojë e plagëve nga arma e zjarrit kishte humbur jetën dhe mjeku kujdestar ka konfirmuar vdekjen e tij, ndërsa i plagosuri tjetër është transferuar për tretman mjekësor në Shërbimin Spitalor Klinik Universitar të Kosovës (SHSKUK) në Prishtinë”, thuhet në njoftim, raporton Dukagjini.