Ambasada e Republikës së Kosovës në Kroaci ka theksuar rolin e diplomacisë kulturore në promovimin e vendit përmes artit, pas suksesit të shkollës së vallëzimit modern “Dancing House” nga Gjilani në festivalin ndërkombëtar të kërcimit International Dance Cup Zagreb.
Në një postim në Facebook, ambasada ka bërë të ditur se të rinjtë nga Kosova u paraqitën me dy performanca të veçanta në këtë festival prestigjioz dhe u vlerësuan me dy çmime të para në kategoritë: Contemporary Group Mini Kids – Çmimi i Parë, Contemporary Kids Formation – Çmimi i Parë.
Performancat thuhet se u realizuan nga dy grupe fëmijësh të moshave 6–8 vjeç dhe 9–12 vjeç, të cilët përfaqësuan Kosovën me profesionalizëm, energji artistike dhe talent të veçantë, duke dëshmuar potencialin e madh të brezit të ri në fushën e artit dhe kulturës.
Sipas ambasadës, ky sukses është rezultat i punës dhe përkushtimit të fëmijëve, si dhe i mbështetjes dhe udhëheqjes profesionale të koreografes Naski Ahmeti nga Gjilani, e cila me përgatitje të kujdesshme dhe vizion artistik arriti të sjellë një prezantim dinjitoz në skenën ndërkombëtare.
Ambasada thekson se kjo arritje përfaqëson një shembull të fuqishëm të diplomacisë kulturore, përmes së cilës rinia e Kosovës promovon vlerat, talentin dhe identitetin kulturor të vendit në arenën ndërkombëtare.