Deputeti shqiptar në Parlamentin e Serbisë, Shaip Kamberi, ka bërë të ditur se është dorëzuar kërkesa për shkarkimin e ministres serbe, Snezana Paunoviq.
Sipas Kamberit, nisma është iniciuar nga Grupi Parlamentar “Lëvizja e Qytetarëve të Lirë – SDA e Sanxhakut” dhe Partia për Veprim Demokratik, ndërsa është mbështetur edhe nga 47 deputetë të tjerë opozitarë.
Ai ka bërë të ditur se gjithsej 53 deputetë kanë dorëzuar te kryeministri i Serbisë, Gjuro Macut, kërkesën zyrtare që t’i propozohet Kuvendit të Serbisë shkarkimi i ministres Paunoviq, pas deklaratave të saj lidhur me “spastrimin etnik të shqiptarëve” gjatë viteve ’90.
“Kryeministri ka përgjegjësi politike dhe institucionale të reagojë dhe të dëshmojë se në Qeverinë e Serbisë nuk ka vend për një ministre që mbron idetë e dëbimit të njerëzve mbi bazën e përkatësisë së tyre kombëtare dhe që promovon veprime jashtë ligjit dhe procedurave gjyqësore”, ka shkruar Kamberi.
Ai ka paralajmëruar se nëse kryeministri Macut nuk e propozon shkarkimin e Paunoviqit, atëherë do të mbajë përgjegjësi për vazhdimin e mandatit të saj dhe për lejimin e një politike të tillë brenda Qeverisë së Serbisë.
Kamberi ka kritikuar gjithashtu partitë e pakicave kombëtare që janë pjesë e qeverisë serbe, duke thënë se ato nuk e kanë mbështetur iniciativën për shkarkimin e ministres Paunoviq.
Sipas tij, kërkesën nuk e kanë përkrahur as partitë boshnjake të udhëhequra nga Zukorliq dhe Lajiq, si dhe as partia hungareze e Pastorit.