Një aksident trafiku ka ndodhur të premten e 16 dhjetorit, në rrugën “Hasan Prishtina” në Obliq.
Kështu ka bërë të ditur për Portali Dukagjini, zëdhënësja e Policisë së Kosovës për Rajonin e Prishtinës, Flora Ahmeti, e cila ka shtuar se në këtë aksident janë përfshirë dy vetura.
Ajo ka theksuar se si pasojë e aksidentit, dy persona kanë pësuar lëndime trupore, ndërsa aksidenti ka ndodhur rreth orës 13:00.
“Sot rreth orës 13:00, është pranuar informata për një aksident trafiku rrugor të ndodhur në rrugën ‘Hasan Prishtina’ në Obiliq. Në aksident janë përfshirë dy automjete, ku tre persona kanë pësuar lëndime trupore. Njësia rajonale e trafikut po merret me rastin”, ka thënë Ahmeti.
Sipas saj, njësitet policore relevante janë duke u marrë me aksidentin.
Ndryshe, në po të njëjtën rrugë, të premten e 9 dhjetorit, dy këmbësore, nëna 45-vjeçare dhe e bija e saj, janë goditur nga një automjet dhe kanë marrë lëndime të rënda trupore.
Ahmeti kishte bërë të ditur se 45-vjeçarja, e cila u aksidentua kishte vdekur. Ndërkaq, e bija ishte raportuar se është në gjendje stabile, ndonëse ka lëndime serioze.