Kryeministrja socialdemokrate e Suedisë, Magdalena Andersson, të mërkurën ka pranuar humbjen, dhe ka njoftuar se do të japë dorëheqje nga pozita e saj si kryeministre, pasi opozita shënoi një fitore në një nga zgjedhjet më të afërta ndonjëherë në vendin më të madh nordik.
Me 99% të votave të numëruara, Andersson e cila u bë kryeministrja e parë grua e Suedisë vitin e kaluar, ka thënë se rezultatet treguan se kundërshtarët e saj kanë fituar.
“Kështu që nesër do të dorëzoj dorëheqjen time si kryeministre, dhe përgjegjësia për procesin e vazhdueshëm do t’i shkojë kryetarit,” u ka thënë Andersson, gazetarëve gjatë një konferencës për shtyp.
Megjithatë, posti i Kryeministrit sipas të gjitha gjasave do t’i shkojë kreut të Partisë së Moderuar, Ulf Kristersson, pasi kreu i Social Demokratëve, Jimmie Akesson, nuk është në gjendje t’i bashkojë të katër partitë për të drejtuar qeverinë, raporton France 24, transmeton Dukagjini.
“Tani filloj punën për formimin e një qeverie të re dhe të fortë”, ka thënë Kristersson në një video të postuar në Facebook.
Po ashtu, në një postim në Facebook të mërkurën, Akesson ka falënderuar “miqtë e Suedisë”, në mbarë vendin. “Tani fillon puna për ta bërë Suedinë përsëri të madhe,” ka deklaruar kreu i partisë.
Formalisht, procesi i ndryshimit politik mund të nisë vetëm pas njoftimit të dorëheqjes së kryeministres Andersson të enjten.
Ndërsa, kryetari i organit më të lartë vendimmarrës të Suedisë, “Riksdag”, mund t’i japë Ulf Kristersson-it detyrën për të formuar një shumicë mes katër partive, duke hapur një periudhë negociatash.
Zgjedhja e kreut të ri të qeverisë nuk mund të bëhet para 27 shtatorit, kur të hapet përsëri parlamenti.
Zgjedhjet në Suedi: Partia e djathtë opozitare kryeson minimalisht