Temperaturat e ulëta po vështirësojnë punën e punëtorëve të kërkim-shpëtimit në vendet që pësuan nga tërmeti në Turqi dhe Siri.
Përpjekjet e shpëtimit po bëhen “më të vështira” për shkak të motit të ftohtë në Turqi dhe Siri, paralajmëruan ekspertët, shkruan CNN.
“Është ftohtë por edhe koha që kalon…Kur është ftohtë, kjo ndikon edhe më shumë në përpjekjet e shpëtimit”, ka thënë zëdhënësja e Oxfam në Turqi, Meryem Aslan për John Vause të CNN.
“Përveç motit, ka ende zona ku njerëzit po përpiqen të gërmojnë me duar. Ekipet e shpëtimit nuk kanë arritur ende kudo. Është jashtëzakonisht e vështirë. Ne po garojmë me kohën”, shtoi ajo.
Temperaturat tashmë janë shumë të ulëta, por parashikohet të bien disa gradë nën zero të mërkurën e tetë shkurtit.
Ndërkohë në Aleppo të Sirisë temperaturat pritet të qëndrojnë në zero.
Reshjet e shpërndara dhe bora në rajon pritet të vazhdojnë, duke vënë në rrezik jetën e të bllokuarve nën rrënoja, të cilët tashmë kanë kaluar ditë pa ushqim dhe ujë.
Numri i të vdekurve nga tërmeti shkatërrues që preku Turqinë e Sirinë të hënën, është rritur në më shumë se 9 mijë.
Statistikat e përditësuara tregojnë se më shumë se 6 mijë e 597 njerëz kanë vdekur në Turqi, ndërsa afro 2500 raportohen të vdekur në Siri.
Ndërkohë që numri total i të vdekurve ka arritur në 9427.
Ekipet e shpëtimit po kërkojnë për të mbijetuar, madje edhe shtetet e tjera kanë dërguar ekipe të kërkim-shpëtimit në shenjë ndihme ndaj Turqisë.
Vendi është goditur nga një tërmet të hënën e 6 shkurtit, me magnitudë 7.8.
Presidenti turk, Rexhep Tajip Erdogan është planifikuar të vizitojë Kahramanmaras dhe Hatay, kështu ka njoftuar zyra e presidentit.
Ndërsa, është theksuar se do të shkojë edhe në Pazarcik, aty ku ishte epiqendra e tërmetit.