Ministrja e Drejtësisë, Albulena Haxhiu, ka publikuar të enjten dokumentet e listave të pasurive të konfiskuara dhe të sekuestruara të Milan Radojçiqit.
Në një postim në Facebook, Haxhiu ka theksuar se Radojçiqi që vetë është bërë milioner derisa qytetarët e komunitetit serb i ka përdorur përmes frikës, kërcënimit dhe shantazhit.
Sipas saj, kjo epokë tashmë ka marrë fund, teksa ka shtuar se ka ardhur koha që qytetarët të jetojnë të qetë e kriminelët të ndëshkohen.
“Dokumentet më poshtë janë lista të gjata të pasurive të shumta të konfiskuara dhe sekuestruara të një kryekrimineli që vet është bërë milioner ndërkohë që qytetarët e komunitetit serb i ka përdorur përmes frikës, kërcënimit dhe shantazhit. Pra, për vete milioner përmes krimit e qytetarëve terrorin dhe varfërimin. Por, kjo epokë ka marrë fund. Ka ardhë koha që qytetarët të jetojnë të qetë e kriminelët të ndëshkohen”, ka shkruar Haxhiu.
Konfiskohet restoranti dhe banesa e Radojçiqit në veri
Policia e Kosovës të enjten ka bërë të ditur se është konfiskuar restoranti dhe banesa e kryeterroristit serb, Milan Radojçiq, në veri të vendit.
Zëvendësdrejtori i Policisë për rajonin e Veriut, Veton Elshani, ka thënë se kjo është bërë nga zyrtarët e Agjencisë për Administrimin e Pasurisë së Sekuestruar dhe të Konfiskuar (AAPSK), në bashkëpunim me Policinë e Kosovës.
Ministrja e Drejtësisë, Albulena Haxhiu, një ditë më parë ka njoftuar se kanë nisur zbatimin e Urdhrit Ndalues përfundimtar me masë të përkohshme, lidhur me pasuritë e paluajtshme në rastin “Banjska”.
Lexo më shumë: Nis zbatimi i Urdhrit Ndalues lidhur me pasuritë e paluajtshme të Radojçiqit në veri