Presidenti turk Rexhep Tajip Erdogan deklaroi të hënën se nuk mund të ketë paqe në Lindjen e Mesme për sa kohë që Izraeli mban nën pushtim Palestinën.
Ai theksoi se stabiliteti rajonal është i pamundur pa përfundimin e pushtimit dhe krijimin e një shteti palestinez në kufijtë e vitit 1967.
“Sa kohë që Palestina vazhdon të vuajë, asnjë vend në rajon nuk mund të ndihet i sigurt”, tha Erdogan gjatë fjalimit drejtuar kombit.
Udhëheqësi turk vuri në dukje se Turqia po vazhdon të dërgojë ndihma humanitare në Rripin e Gazës, pavarësisht vështirësive.
“Edhe pse Izraeli vendos pengesa për dërgesat humanitare, ne po e vazhdojmë mbështetjen. Anija e 18-të me ndihma ka mbërritur në rajon, dhe 47 kamionë kanë arritur në pikën kufitare të Rafahut. Banorët e Gazës që jetojnë në kampe me tenda kanë nevojë për ndihmë të menjëhershme. Dërgimi i kontejnerëve nga vendi ynë do të ndihmojë në përmirësimin e kushteve të tyre”, shtoi ai.