Familja e Liridona Ademajt, gruas që u vra më 29 nëntor në Prishtinë ka kërkuar një takim urgjent me prokurorinë, për të marrë informacion mbi hetimet dhe zhvillimet lidhur me rastin.
Leonard Ademaj, vëllai i së ndjerës, ka theksuar se ende nuk kanë pasur asnjë kontakt zyrtar nga prokuroria dhe se nuk dinë kush është prokurori i përgjegjshëm për rastin.
Në njoftimin e postuar në Facebook, familja, sipas tij, e vlerëson punën e deritanishme të policisë dhe të prokurorisë, por shpreh shqetësimin e tyre për mungesën e komunikimit zyrtar.
“Ju njoftojmë se sapo i jemi drejtuar prokurorisë për një takim urgjent që të informohemi rreth rastit të vrasjes së më të dashurës tonë Liridona Ademaj. Ne jemi thellësisht falenderues për punën e bërë deri më tani nga policia dhe prokuroria. Mirëpo, jemi të shqetësuar që deri më tani prokuroria nuk ka kontaktuar fare me neve”, ka shkruar vëllai i Liridona Ademajt në Facebook.
Ata theksojnë se nuk janë informuar zyrtarisht se kush është prokurori i rastit, por se kanë marrë informacione vetëm nga mediet.
“Ne ende zyrtarisht nuk jemi informuar se kush është prokuror i rastit dhe informacionet e vetme i kemi nga raportimet në media. Ne duam të sqarojmë që nuk kërkojmë qasje në informacione konfidenciale, mirëpo kërkojmë që si familjarë të jemi të informuar, e drejtë kjo e garantuar ligjërisht”, ka shkruar tutje ai në Facebook.