Familjarët e Bashkim Smakajt, ish-këshilltarit të Hashim Thaçit, janë shprehur të habitur dhe të shqetësuar pas bastisjes së shtëpisë së tyre nga Gjykata Speciale.
Siç raporton ekipi i terrenit të RTV Dukagjini, bastisja ka filluar për më shumë se 5 orë dhe familjarëve u është ndaluar që të hyjnë në shtëpinë e Smakajt.
Një prej familjarëve ka treguar se nuk e kanë pritur këtë bastisje dhe nuk e dinë arsyen e saktë të saj.
Ai ka theksuar se kanë dëgjuar për bastisjet në mediat, por nuk kanë pasur informacione të detajuara mbi arsyet e kësaj bastisjeje.
“Ne nuk dimë asgjë rreth bastisjeve, kemi dëgjuar edhe ne prej mediave. Nuk e kemi pritur këtë bastisje…Deshëm të shkojmë me shiku se çka po bëhet, me i dit arsyet pse, nuk mundemi me hy deri të dalin policia… Zoti Smakaj më ka axhë, unë djalë të vëllait e kam… Nuk besoj që kemi, nuk kemi bërë kurrfarë vepre. Nuk janë të mira këto bastisje, këto janë do akuza të pavërteta, me dëshmitarë të rrejshëm. Gjithkush flet diçka edhe këta i marrin si diçka, po nuk ka asgjë”, ka deklaruar Hetem Smakiqi – Axha i Bashkimit.
Zyra e Prokurorit të Specializuar i ka konfirmuar bastisjet në shtëpitë e dy ish-këshilltarëve të Hashim Thaçit, Blerim Shala dhe Bashkim Smaka.
Bastisjet ndaj Shalës i ka konfirmuar vetë avokati i tij, Artan Qerkini, i cili ka thënë se bastisja ka qenë e shkurtër dhe se për shpalosjen e detajeve të tjera do të konsultohet gjatë ditës me Shalën, klientin e tij.
Ndërkaq, nga shtëpia e ish-shefit të AKI-së, Bashkim Smaka, Dukagjini ka raportuar nga vendi i ngjarjes.