Trajneri i Kombëtares së Kosovës, Franco Foda, para ndeshjes vendimtare ndaj Turqisë, ka theksuar se përballja pritet të jetë shumë e fortë dhe e hapur.
Foda ka përmendur disa nga lojtarët kryesorë të Turqisë, duke i cilësuar si rrezik për skuadrën e tij, por njëkohësisht ka theksuar se edhe Kosova ka cilësi të mjaftueshme për të rivalizuar.
“Ekipi i Turqisë është shumë i fortë. Ka lojtarë individualë si Yildiz, Guler, Çalhanoglu. Ka shumë lojtarë kualitativë, por edhe ne kemi kualitet. Shanset janë 50-50, do të bëjmë të pamundurën, do të japim gjithçka që ta fitojmë ndeshjen”, ka deklaruar ai.
Ai gjithashtu ka lënë të hapur mundësinë që Edon Zhegrova të luajë nga minuta e parë në këtë përballje.
“Ka gjasa që Edoni të luajë nga fillimi”, u shpreh Foda.
Foda ka folur edhe për mundësinë që ndeshja të zgjasë deri në shtesa apo penallti, duke theksuar rëndësinë e përgatitjes për çdo skenar.
“Nuk mund të bëj parashikim sa do të zgjasë loja nesër. Ka mundësi të shkojë në 120 minuta dhe të ketë penallti. E rëndësishme është që jemi të përgatitur për të gjithë skenarët”, theksoi ai.
Sa i përket taktikës, trajneri i Kosovës ka deklaruar se nuk do ta zbulojë planin para ndeshjes, por ka theksuar rëndësinë e disiplinës dhe tranzicionit të shpejtë.
“Nuk do ta zbuloj sot taktikën. E njohim anën e fortë, por edhe dobësitë e Turqisë. E rëndësishme është që edhe nesër të performojmë me idetë tona. Duhet të jemi kompakt dhe kur ta kemi topin të kthehemi menjëherë në kundërsulm,” u shpreh ai.
Mes tjerash, Foda ka theksuar rëndësinë e përmirësimeve në mbrojtje dhe faktin që Kosova luan në shtëpi.