Ministrat e Jashtëm të vendeve të G7 kanë shprehur gatishmërinë për të ndërmarrë masa të nevojshme në funksion të garantimit të furnizimit global me energji, në një kohë kur tensionet në Lindjen e Mesme po rriten ndjeshëm.
Në deklaratën e tyre, theksohet se Irani ka ndërmarrë veprime hakmarrëse ndaj sulmeve amerikane dhe izraelite, duke shënjestruar vendet e Gjirit, infrastrukturën energjetike dhe transportin detar në Ngushticën e Hormuzit – një korridor kyç për furnizimin global me naftë.
Ky angazhim i G7 vjen pasi Agjencia Ndërkombëtare e Energjisë njoftoi lirimin e 400 milionë fuçive naftë nga rezervat strategjike, me qëllim zbutjen e pasojave të mundshme të mungesave në tregjet globale për shkak të konfliktit.
Në të njëjtën deklaratë, ministrat e jashtëm të Kanadasë, Francës, Gjermanisë, Italisë, Japonisë, Mbretërisë së Bashkuar dhe Shteteve të Bashkuara, së bashku me Përfaqësuesin e Lartë të Bashkimit Evropian, kanë bërë thirrje për ndërprerjen e menjëhershme dhe pa kushte të të gjitha sulmeve nga ana e Iranit.