Analisti, Astrit Gashi, ka thënë se kryeministri i Kosovës, Albin Kurti nuk ka pasur mundësi se si t’i ikë vendimit për Manastirin e Deçanit.
“Te vendimi i pronave të Manastirit të Deçanit, nëse i heqim historinë e deklarimeve politike, ka qenë një vendim që kryeministri Kurti nuk ka pasur mundësi sesi t’i ikë”, ka thënë Gashi në “Debat Plus”.
“Ka qenë e pamundshme t’i ikësh atij vendimi. Është vendim i Gjykatës Kushtetuese…Na pëlqeu, s’na pëlqeu…”, ka thënë analisti.
Gashi është shprehur se këtë vendim nuk duhet ta quajmë si “vendim të Millosheviqit”, sepse sipas tij, as UNMIK-u nuk ka mundur t’i zbatojë këto vendime në të 2000-t.
Ai ka thënë se duhet të kemi shumë kujdes se si e interpretojmë këtë.
Më 13 mars të këtij viti, kryeministri i Kosovës, Albin Kurti, bëri të ditur se qeveria i ka kërkuar Agjencisë Kadastrale të Kosovës të zbatojë vendimin e Gjykatës Kushtetuese të Kosovës të vitit 2016 për tokën e Manastirit të Deçanit.
Lexo më shumë: Qeveria i jep dritën jeshile Agjencisë Kadastrale t’ua bartë pronat Manastirit të Deçanit
“Andaj, sot i kemi thënë Agjencisë Kadastrale të Kosovës të zbatojë vendimin e Kushtetueses. Ministrja Gërvalla i ka dërguar notë verbale njoftuese Këshillit të Evropës”, kishte thënë Kurti.
Dioqeza e Rashkës dhe Prizrenit e Kishës Ortodokse Serbe në Kosovë, dje konfirmoi se Manastiri i Deçanit ka regjistruar në emër të tij 20 hektarë tokë në Kadastrën qendrore të Kosovës, në Prishtinë.
Lexo më shumë: Manastiri i Deçanit regjistron pronësinë e 24 hektarëve tokë
“Në bazë të ekstraktit kadastral mund të konfirmojmë që është zbatuar vendimi i Gjykatës Kushtetuese i vitit 2016 dhe Manastiri edhe në kadastër njihet si pronar i tokës së kontestuar më herët. Me këtë ne mundemi konkludojmë se procesi i kahershëm ligjor që është zhvilluar rreth 24 hektarëve tokë të Manastirit të Deçanit më në fund është zgjidhur”, thuhet në njoftim e djeshëm.