Ministrja e Punëve të Jashtme dhe Diasporës, Donika Gërvalla, ka pritur në takim ministren e Punëve të Jashtme të Japonisë, Yōko Kamikawa.
Në këtë takim është diskutuar për thellimin e marrëdhënieve bilaterale në mes të Kosovës dhe Japonisë, mbështetjen në anëtarësimin e Kosovës në organizata ndërkombëtare, bashkëpunimin në realizimin e projekteve dhe të investimeve kapitale dhe strategjike.
“Gjatë këtij takimi Ministrja Gërvalla shprehu falënderimet e saj për gjithë mbështetjen e madhe që Japonia i ka dhënë Kosovës në shumë fusha, si në rindërtim, zhvillim ekonomik, arsim dhe proceset integruese. Tutje Ministrja Gërvalla e njoftoi homologen e saj rreth progresit që Republika e Kosovës ka arritur në demokratizim, sundim të ligjit, zhvillim ekonomik, respektim të të drejtave të njeriut etj”, thuhet në njoftim.
Me homologen e saj nga Japonia, Gërvalla ka diskutuar edhe për zhvillimin e njohurive të teknologjisë informatike dhe digjitalizimit, duke u dakorduar për angazhim të përbashkët në realizimin e projekteve konkrete, që për synim kanë tërheqjen e investimeve japoneze, krijimin e mundësive të punësimit të të rinjve dhe zhvillimin ekonomik të Kosovës.