Ministrja e Punëve të Jashtme të Kosovës, Donika Gërvalla, ka marrë pjesë në ditën e dytë të Forumit për Gratë, Paqen dhe Sigurinë, i cili po mbahet në Prishtinë.
Në fjalimin e saj, ministrja Gërvalla është shprehur se roli i ish-Sekretares Madeleine Albright, në Kosovë, është i jashtëzakonshëm dhe shumë i rëndësishëm. Rëndësia e ish- sekretarës Albright në Kosovës, sipas ministres Gërvalla, është e madhe kur bëhet fjalë për ndalimin e luftës në Kosovë.
Tutje, Gërvalla ka theksuar se ish-sekretarja, Madeline Albright, ishte njeriu i parë që ndërroi rrjedhën e historisë së Kosovës dhe shpëtoi mijëra jetë njerëzish.
“Madeleine Albright ishte një prej njerëzve më të rëndësishëm që kishte shteti im Kosova. Albright është për mua njeriu i parë që ndryshoi historinë kur na ndihmoi neve për të mposhtur gjenocidin serb në Kosovë. Ajo shpëtoi mijëra jetë, ajo ishte çelësi për mbarimin e luftës në Kosovë”, është shprehur Gërvalla.
Me iniciativë të presidentes së Republikës së Kosovës, Vjosa Osmani, zëvendëskryeministres dhe Ministres së Punëve të Jashtme, të shtunën dhe të dielën, në Prishtinë, po zhvillon punimet Forumi Ndërkombëtar për Gratë, Paqen dhe Sigurinë, që është organizimi i parë i këtij lloji.
Ky organizim, sipas komunikatës së zyrës së Presidencës, mbështetet nga partnerë vendorë dhe ndërkombëtarë.