Ministri i Financave, Hekuran Murati, dhe kryesuesja e Divizionit për Evropën Juglindore dhe Lindore, Heike Backofen-Warnecke, kanë nënshkruar protokollin e bashkëpunimit që zoton 90 milionë euro mbështetje nga Gjermania.
Këto mjete janë zotuar për periudhën 2024/2025, prej të cilave 20 milionë euro janë në formë të granteve.
“Kjo marrëveshje e re shënon rritje të theksuar të vlerës së mbështetjes krahasuar me atë paraprake për periudhën 2022/2023, që ishte në vlerë prej 37 milionë euro, duke dëshmuar kësisoj thellimin e bashkëpunimit në mes të të dyja vendeve”, thuhet në njoftim.
Këto mjete do të mbështesin integrimin e Kosovës në Bashkimin Evropian dhe ndër të tjera fokusohen në investime në sektorin e energjisë, përkatësisht procesin e dekarbonizimit, garantim të zhvillimit ekonomik të qëndrueshëm, ofrim të trajnimeve dhe të punësimit, si dhe mbështetje të komunave, veçanërisht në menaxhimin e mbeturinave dhe ruajtjen e mjedisit.
“Ministri i Financave, Punës dhe Transfereve, Z. Hekuran Murati theksoi bashkëpunimin e ngushtë me Qeverinë Gjermane duke përmendur disa projekte të rëndësishme që janë zbatuar në kuadër të këtij bashkëpunimi, siç është projekti për ndërtimin e ngrohtores diellore dhe rehabilitimin e ujërave të zeza në Prishtinë, menaxhimit të mbeturinave në të gjithë Kosovën si dhe themelimin e Parkut të Inovacionit dhe Trajnimit (ITP) në Prizren. Sa i përket mbështetjes së zotuar sot, Ministri Murati falënderoi Qeverinë Gjermane, duke potencuar se një mbështetje e tillë forcon edhe më tutje marrëdhëniet ndërmjet dy vendeve, promovon zhvillimin ekonomik të Kosovës dhe e përafron atë me Bashkimin Evropian”, thuhet tutje në njoftim.
Nga ana e tij, ambasadori gjerman, Jörn Rohde, ka theksuar bashkëpunimin gjermano-kosovar, duke thënë se ky i fundit ka kontribuuar në standard më të mirë të jetesës për të gjithë qytetarët. Sipas tij, projektet e radhës që do të zbatohen përmes fondeve të zotuara sot, do të nxisin zhvillimin ekonomik të gjelbër dhe inovativ të Kosovës.