Gjykata Speciale ka arrestuar të enjten ish-kryetarin e Komunës së Malishevës, Isni Kilaj.
Lajmin për Dukagjinin e ka konfirmuar djali i tij, Blend Kilaj.
Ai ka thënë se arrestimi i babait të tij ka ndodhur rreth orës shtatë të mëngjesit, dhe se nuk e di se për çfarë motivi është arrestuar babai i tij tani.
“Babai im u arrestua sot në orën 7 të mëngjesit. Nuk na thanë arsyet pse. E dërguan në EULEX për ta transferuar në Hagë”, ka thënë djali i Kilajt.
Kilaj ka qenë ish-komandant i UÇK-së dhe i njëjti ishte arrestuar edhe më parë nga kjo Gjykatë më 2 nëntor 2023.
Në nëntor të vitit 2023, Kilaj u arrestua nga Dhomat e Specializuara në Hagë, nën dyshimet për veprat penale që kanë të bëjnë me pengimin e drejtësisë.
Ai u lirua më 15 maj 2024, me “kushte të rrepta”, në bazë të vendimit të gjykatësit të vetëm të Dhomave të Specializuara të Kosovës (DHSK) të datës 3 maj 2024.
Lirimi i tij me kusht është mundësuar pas dhënies së dorëzanisë prej 30.000 eurosh.