Greqia merr drejtimin e misionit detar të BE-së në Detin e Kuq

Greqia ra dakort të drejtojë misionin detar të BE-së në Detin e Kuq, për të mbrojtur linjat e transportit detar nga sulmet e militantëve huthi në Jemen

Një fregatë greke duke u nisur nga porti i Pireut. Foto: AP

Greqia ra dakort zyrtarisht të hënën të marrë pjesë dhe të drejtojë misionin detar të Bashkimit Evropian në Detin e Kuq, për të mbrojtur linjat e transportit detar nga sulmet e militantëve huthi në Jemen.

Një komitet sigurie i drejtuar nga kryeministri Kyriakos Mitsotakis urdhëroi pjesëmarrjen e një fregate greke në operacionin e quajtur “Aspides”, sipas fjalës greke “mburojë”, operacion që u njoftua javën e kaluar.

Misioni do të drejtohet nga baza detare në Larisa të Greqisë, nën komandën e admiralit grek Vasilios Griparis.

Greqia ka një segment të rëndësishëm të transportit detar tregtar dhe është prekur drejtpërsëdrejti nga sulmet e huthive. Në portin e Pireut, pranë Athinës, u njoftua një rënie me 12.7% në aktivitetet në terminale gjatë janarit.

“E kuptojmë të gjithë se pjesëmarrja në këtë operacion sjell rreziqe, rreziqe domethënëse”, tha të hënën ministri i Mbrojtjes, Nikos Dendias, gjatë një vizite në fregatën “Hydra” në një bazë detare pranë Athinës.

Fregata u nis për në mision në orët e vona të së hënës.

“Greqia, si një fuqi detare me rol kryesor në transportin global, i kushton rëndësi të madhe nevojës për të ruajtur lirinë e lundrimit, si dhe jetën e grekëve që udhëtojnë në rrugë detare”, tha Dendias.

Gjermania, Italia dhe Franca do të ofrojnë gjithashtu mjete detare për këtë mision, që do t’i bashkohen fregatës “Hydra”, ndërsa Italia do të marrë komandën taktike, thanë zyrtarët grekë.

Ministri gjerman i Mbrojtjes, Boris Pistorius, vizitoi fregatën gjermane “Hessen”, që merr pjesë në misionin Aspides, ndërsa vizitonte Kretën javën e kaluar. Anija është zhvendosur tashmë drejt Detit të Kuq, thanë autoritetet gjermane.

Zyrtarët në Athinë e kanë përshkruar misionin Aspides si të natyrës mbrojtëse, duke shtuar se Greqia nuk do të marrë pjesë në sulmet e udhëhequra nga Shtetet e Bashkuara ndaj objektivave ushtarake të rebelëve huthi në Jemen.

Rebelët huthi, që mbështeten nga Irani, thonë se sulmet e tyre ndaj anijeve tregtare me dronë dhe raketa janë në përgjigje të ofensivës së Izraelit ndaj Hamasit në Gazë që filloi në tetor.

Gjatë një seance dëgjimore në një komision parlamentar javën e kaluar, zoti Dendias tha se mbajtja hapur e linjave të tregtisë në det është një “domosdoshmëri ekzistenciale për Greqinë”.

“Nuk marrim qëndrim për çështjen huthi”, u tha Dendias ligjvënësve.

“Por sfidojmë të drejtën e çdokujt që të hapë zjarr ndaj anijeve tona, ndaj anijeve evropiane dhe anijeve që lundrojnë në rajon dhe që vijnë në portet tona”. /VoA

Shija e redaktorit

Spanja në finale, mposht Francën

Kombëtarja e Spanjës ka arritur kualifikimin në finale të Euro 2024, pasi mposhti me rezultat 2:1 kombëtaren e Francës në gjysmëfinale. Në pjesën e dytë...

Ballkani triumfon në ndeshjen e parë kualifikuese në Ligën e...

Ballkani ka fituar 2-1 ndaj Santa Coloman në 1/8 e fazës kualifikuese në Ligën e Kampionëve. Ndeshja nisi me një ritëm të qetë, por që...

Blinken duartroket rolin e Osmanit për hapjen e qendrës rajonale...

Sekretari amerikan i Shtetit, Antony Blinken, ka vlerësuar rolin e presidentes së Kosovës, Vjosa Osmani, në hapjen e qendrës rajonale “Gratë, Paqja dhe Siguria”...

Të fundit nga rubrika