Deputeti i Lëvizjes Vetëvendosje, Haki Abazi, ka dhënë dorëheqje nga pozita e anëtarit të Komisionit Hetimor Parlamentar për Energji.
Këtë për Portali D, e ka konfirmuar kryesuesi i këtij komisioni, Hajdar Beqa, njëkohësisht deputet i Partisë Demokratike të Kosovës.
“Në bazë të komunikimit që e kemi si komision përmes një grupi në rrjetet sociale, Abazi e ka paralajmëruar dorëheqjen, ku në seancën e radhës do të vendoset dikush tjetër në vend të tij. Ai është drejtuar vetëm përmes rrjeteve sociale përmes komunikimit të brendshëm që e kemi si grup. Zyrtarizimi do të bëhet në mbledhje”, ka thënë Beqa.
Në anën tjetër, deputeti Abazi, për Portali D të RTV Dukagjinit, ka thënë se “ende asgjë nuk është zyrtarizuar”, duke mos dhënë detaje të tjera.
Anëtarët e tjerë të këtij komisioni nga radhët e PDK-së, është Rashit Qalaj, nga LVV do të jenë Armend Muja, Arbër Rexhaj, Halil Thaçi, nga Lidhja Demokratike e Kosovës do të jetë Armend Zemaj dhe Rezarta Krasniqi, nga Aleanca për Ardhmërinë e Kosovës – Time Kadrijaj, nga Lista Serbe Ljubinko Karadziq, si dhe nga grupi multietnik për anëtare është Duda Balje.
Deputetët e Kuvendit të Kosovës kanë votuar për themelimin e dy komisioneve hetimore për energjinë elektrike gjatë seancës së 5 majit, gjatë së cilës pati debate të ashpra.
Komisioni hetimor i propozuar nga opozita mëton që të hetojë të gjitha masat e ndërmarra gjatë periudhës së gjendjes emergjente për energjinë, që Kuvendi kishte votuar për të shpallur vitin e kaluar.
Ndër masat e ndërmarra në periudhën e gjendjes emergjente ishin: vendosja e kufizimeve në furnizim me energji për konsumatorët dhe vendosja e obligimeve të veçanta për ndërmarrjet e energjisë. Si pasojë e krizës energjetike, Kosova u përball me shtrenjtim të rrymës.
Sipas Ligjit për hetim parlamentar, komisionet hetimore kanë qëllim edhe për informim, rekomandim dhe ushtrim të mbikëqyrjes parlamentare dhe të arritjes së një përfundimi.