Pas rritjes së numrit me të infektuar nga COVID-19, Prishtinës i është shtuar edhe një qendër ku mund të kryhen testet për virusin Corona.
Kështu ka bërë të ditur Drejtori i Shëndetësisë në Komunën ne Prishtinës, Izet Sadiku, i cili ka njoftuar se qendra është hapur në Qendrën Mjekësore Familjare numër 4 në lagjen “Xhamal Ibishi”.
“Duke parë që ditëve të fundit është rritur numri i rasteve me COVID19 që ka ndikuar në rritjen e kërkesës për testim për COVID-19, nga sot e kemi hapur edhe një qendër për testim”, ka shkruar Sadiku në Facebook.
Orari për testim në këtë qendër është nga ora 8:00 deri në orën 15:00, nga e hëna në të premten.
Ndërkaq, në Qendrën e Studentëve, testimet kryhen gjatë gjithë ditëve të javës, nga ora 8:00 deri në orën 16:00.
Ndryshe, sipas të dhënave të IKSHPK-së, ka njoftuar se tre persona kanë humbur betejën me COVID-19 dhe 978 të tjerë kanë rezultuar pozitivë, të dielën e 24 korrikut.
Gjatë kësaj periudhe, janë shëruar një mijë e 83 persona.
COVID-19 po kalon një valë të madhe të prekurve.
Një numër i madh i të infektuar me COVID-19 është shënuar gjatë javës së fundit.
Këtë e ka bërë të ditur edhe Ministria e Shëndetësisë, ku sipas tyre ka edhe numër të madh të pacientëve të hospitalizuar.
Sipas të dhënave nga Ministria e Shëndetësisë, numri i rasteve aktive me COVID-19 është 9 mijë e 300.