Kryetari i Aleancës për Ardhmërinë e Kosovës (AAK), Ramush Haradinaj, pas mbylljes së pikave kufitare për shkak të bllokimit të rrugës në territorin e Serbisë, ka thënë se “skenari i regjimit prorus të Serbisë për destabilizimin e Kosovës, po hyn në një fazë kritike”.
Ai duke përmendur mbylljen e pikave kufitare, sulmet ndaj qytetarëve, gazetarëve, policisë, EULEX-it e KFOR-it, ka theksuar se këto kanë marrë përmasa shqetësuese.
Haradinaj në një postim në rrjetin social Facebook, ka shtuar se gjendja mund të përshkallëzohet dhe të dalë krejtësisht jashtë kontrollit.
“Prandaj në një situatë të tillë, është urgjente që Kosova të mobilizojë gjithë potencialin e vet politik, diplomatik, intelektual e të sigurisë në përballje me këtë rrezik të madh”, ka shkruar ai në Facebook.
Ndërkaq, ai i ka bërë thirrje kryeministrit Albin Kurti, “që të sillet në përputhje me situatën e krijuar”.
Po ashtu, sipas tij, Serbia nuk zmbrapset me retorika boshe luftënxitëse e as me “trimat e rrjeteve sociale”.
I pari i AAK-së ka kërkuar nga partnerët ndërkombëtarë të shtetit, duke e veçuar Washingtonin, që ta marrin nën kontroll situatën dhe ta ndalin përshkallëzimin e mëtejmë, i cili sipas tij, paraqet rrezik edhe për paqen në rajon.