Kryetari i Aleancës për Ardhmërinë e Kosovës (AAK), Ramush Haradinaj, teksa ka reaguar pas arritjes së marrëveshjes Kosovë-Serbi, e cila parasheh faturimin e energjisë elektrike për komunat veriore të vendit, ka thënë se nëse pala serbe e zbaton këtë “roadmap”, nuk është keq në krahasim me gjendjen e tanishme.
Përmes një postimi në llogarinë e tij në Facebook, Haradinaj ka theksuar se sipas kësaj marrëveshje nuk preket sovraniteti energjetik i Kosovës.
“Kjo marrëveshje bazohet në marrëveshjet e mëparshme për energjinë të viteve 2013/2015, veçse këtu janë vënë edhe afatet kohore. Sipas saj, nuk preket sovraniteti energjetik i Kosovës, meqë ai është vendosur me Marrëveshjen e re të kyçjes KOST-ENTSO-E, ku ndërkombëtarisht njihen kufijtë energjetikë të Kosovës, në kufijtë shtetëror dhe operimi i pavarur i KOSTT-it nga EMS (Serbia), si zonë rregulluese brenda sistemit rregullator me OST (Shqipërinë)”, ka shkruar Haradinaj.
Në pikën e parë të marrëveshjes thuhet se ZRRE do t’i lëshojë një licencë furnizimi Elektroserver. ZRRE do të sigurojë pajtueshmërinë me kushtet e përcaktuara me licencën e furnizimit, në përputhje me kornizën ligjore dhe rregullative të Kosovës,
Sipas Haradinajt, e njëjta ka qenë edhe pjesë e Marrëveshjes së Kyçjes KOSTT – ENTSO-E.
Ai është dakorduar edhe me pikën e dytë të marrëveshjes, ku thuhet se brenda shtatë ditësh nga lëshimi i licencës për furnizim, Elektroserver do t’i ofrojë KEDS-it dhe KOSTT-it të dhënat më të fundit të disponueshme për konsumatorët, përmes BE-së.
Ndërkohë, Haradinaj ka komentuar edhe pikën e tretë, e cila sipas tij ndërlidhet me aktivitetet me KOSTT ka qenë në planin aksional të Marrëveshjes së Kyçjes KOSTT – ENTSO-E, kurse ato aktivitetet tjera janë të reja nga Marrëveshja e Kyçjes me ENTSO-E, por që bazohen në Marrëveshjen e Energjisë të vitit 2015.
“Pika 4 ka qenë në planin aksional të Marrëveshjes së Kyçjes KOSTT – Entso-E, pika 5 është e re por që bazohet në Marrëveshjen për Energji të vitit 2015, që është në rregull, pika 6 i jep pak më shumë autoritet Elektrosever, pasi që për planin investiv dhe zhvillimor për infrastrukturën e rrjetit transmetues dhe të shpërndarjes, duhet konsultuar Elektrosever”, shtoi Haradinaj.
“Pika 7, ERO (ZRRE) aprovon në princip planet zhvillimore dhe të mirëmbajtjes. Ndoshta për shkak të afateve të ndërlidhura e kanë vënë “në princip”, pasi që aprovimi i këtyre planeve bëhet deri në prill të vitit përkatës përmes tarifave”, ka shkruar ai.
Në shtator të vitit 2013, Kosova dhe Serbia kishin nënshkruar marrëveshjen për çështjen e energjetikës.
Në atë kohë, kryeministër i Kosovës ishte Hashim Thaçi, kurse kryeministër i Serbisë, Ivica Daçiq, të cilët edhe ishin nënshkruesit e kësaj ujdie.
Marrëveshja parasheh që pos Kompanisë për Distribuimin e Energjisë Elektrike – KEDS, në Kosovë të licensohet edhe një kompani tjetër për distribuimin e rrymës.
Ndonëse e konfirmuar në gusht të vitit 2015, e njëjta marrëveshje nuk ëhstë zbatuar asnjëherë.
Sipas marrëveshjes së arritur më 2013, punëtorët e kompanisë serbe për energji në veri të Kosovës – Elektrokosmet, duhet të inkuadrohen në kompaninë e regjistruar sipas ligjeve të Kosovës, ose t’iu ofrohet punësim në KEDS.