Kreu i Aleancës për Ardhmërinë e Kosovës, Ramush Haradinaj, ka pritur në takim ambasadorin e ri të Gjermanisë në Kosovë, Rainer Rudolph.
Haradinaj bën të ditur se ka shprehur gatishmërinë që të punojnë ngushtë për tema të rëndësishme për vendin teksa shton se i kërkoi mbështetjen e tij dhe Gjermanisë për anëtarësim në NATO dhe Bashkim Evropian, njofton Dukagjini.
“Prita sot në takim, ambasadorin e ri gjerman Rainer Rudolph. Ambasadorit i urova mirëseardhjen dhe i shpreha gatishmërinë të punojmë ngushtë për tema me rëndësi për vendin tonë. Duke e uruar për detyrën e re, Ambasadorin Rudolph e falënderova për kontributin e vazhdueshëm dhe të jashtëzakonshëm që e ka dhënë Gjermania për lirinë, pavarësinë dhe zhvillimin e Kosovës. Njëherësh, vlerësova rolin jetik të Gjermanisë në sigurinë e Kosovës. Kërkova mbështetjen e tij dhe të Gjermanisë në përkushtimin tonë për të qenë pjesë NATO-s dhe BE-së”, ka shkruar Haradinaj në Facebook.