Ministrja e Drejtësisë, Albulena Haxhiu, në konferencën për media pas mbledhjes së qeverisë, ka thënë se që nga fillimi i marrjes së detyrës së saj si ministre, sfidën më të madhe e ka pasur jetësimin e zotimit për reformë në drejtësi.
Sipas saj, kjo është si pasojë e pengesës së vazhdueshme të institucioneve të drejtësisë.
Lidhur me këtë, Haxhiu ka marrë si shembull procesin e Vettingut, që ka kaluar testin e Gjykatës Kushtetuese.
“Prej momentit kur kam pranuar detyrën, sfida më e madhe ka qenë jetësimi i reformës në drejtësi. Kemi pasur mbështetje shumë të madhe të qytetarëve për të jetësuar reformën në drejtësi. E dini vetë ju sa kanë nevojë për drejtësi dhe sa shumë e duan atë. Sa shumë duan që Kosova të jetë shtet i së drejtës”, ka thënë Haxhiu.
“Kemi pasur vullnetin tonë të hekurt për të vazhduar sipas zotimeve që kemi dhënë para qytetarëve, por në anën tjetër jemi përballur me pengesat e vazhdueshme nga institucionet e drejtësisë, sepse siç jeni në dijeni, edhe përkundër që kemi aktgjykim të Gjykatës Kushtetuese për Vettingun në sistemin e drejtësisë, ende institucionet e drejtësisë konsiderojnë që nuk ka nevojë Kosova për Vetting që do të verifikonte integritetin e gjyqtarëve dhe prokurorëve”, ka thënë ministrja e Drejtësisë.
Haxhiu ka dhënë detaje edhe për themelimin e Gjykatës Administrative, projektligj që u miratua sot në mbledhjen e Qeverisë.
Për këtë, ministrja ka theksuar se themelimi kësaj gjykate ka qenë zotim i tyre për qytetarët e Republikës së Kosovës.
“Ne votuam këtë projektligj që ka për qëllim zgjedhjen e të gjitha kontesteve administrative përveç atyre në juridiksion të Gjykatës Supreme dhe gjitha kontestet nga marrëdhënia e punës në mes të personit fizik dhe institucionit të sektorit publik. Stafi i kësaj Gjykate do të shtohet me qëllimin që të jenë të përgatitur profesionistë edhe t’i përballojnë lëndët që janë të natyrës administrative”, ka thënë Haxhiu.