Ministrja e Drejtësisë , Albulena Haxhiu, në një konferencë për media pas intervistimit të saj nge hetuesit policorë me ftesë të Prokurorisë Speciale, ka kritikuar, Afrim Shefkiun, prokurorin special në rastin e Astrit Deharit.
Ajo ka thënë se prokurori Shefkiu po e mban peng zbardhjen e rastit Dehari, dhe i njëjti sipas saj, duhet ta kalojë rastin te ndonjë prokuror tjetër.
Haxhiu ka mbështetur deklaratat e prindërve të Astirit Dehari, të cilët kanë kanë kërkuar largimin e prokurorit përgjegjës, Shefkiu në çështjen e hetimeve të vdekjes së djalit të tyre.
“Veprimet arrogante të prokurorit nuk i kuptoj… Kërkesa e familjes është të ndërrohet prokurori tash e sa kohë, dhe pse nuk ka lënë vijë në drejtim të drejtësisë. Prandaj, mbështesim deklaratat e familjes, prandaj nëse prokurori nuk di, nuk mund apo ka ndonjë arsye tjetër, më mirë është të thotë që këtë lëndë ta kalojë në duart e prokurorëve të tjerë apo të një prokurori tjetër”, ka thënë Haxhiu.
Sipas Haxhiut, prokurori Shefiku nuk është marrë me ata “që nuk s’e kanë kryer detyrën si duhet, e ata mund të jenë nxitur e shtyrë nga dikush”.
“Nëse tani s’mund të dihen urdhërdhënësit apo ekzekutorët, prokurorët është dashur të merren me ata që s’e kanë kryer detyrën si duhet, e ata mund të jenë nxitur e shtyrë nga dikush. Drejtësi paralele s’mund të bëjmë. Prokurori të dijë që provë s’është vetëm emri i përveçëm i personit të dyshuar për veprën penale, por gjithçka që çon te e vërteta”, ka thënë Haxhiu.
Duke e quajtur arrogant, Haxhiu ka theksuar se do t’i përgjigjet ftesave të Shefkiut për intervistim çdoherë.
“Prokurori Shefkiu me arrogancë po u përgjigjet atyre që po duan drejtësi për rastin Dehari. Shefkiu me arrogancë reagon edhe ndaj familjes Dehari e ndaj meje. Le të më ftojë sërish për të dëshmuar. Do t’i përgjigjem gjithmonë“, ka thënë ndër të tjera ministrja e Drejtësisë.