Ministrja e Drejtësisë, Albulena Haxhiu, i ka pritur në takim përfaqësuesit e Qendrave për Punë Sociale në Kosovë.
Në njoftimin e kësaj ministrie thuhet se është diskutuar për sfidat e Qendrave për Punë Sociale “me ç’rast nga përfaqësuesit e tyre u prezantua gjendja në Qendrat për Punë Sociale në Kosovë dhe në organizimin e shërbimeve sociale përgjithësisht”.
Haxhiu ka kërkuar që të thellohet bashkëpunimi ndërinstitucional, të ngritet cilësia e shërbimeve të ofruara si dhe të reformohen ato.
“…Ministrja Haxhiu kërkoi të shtohet bashkëpunimi ndërinstitucional në ngritjen e cilësisë së shërbimeve sociale, por edhe reformimin e tyre, si dhe adresimin e nevojave për përmirësimin dhe avancimin e kornizës ligjore për shërbimet sociale pas kalimit të tyre nga Ministria e Financave, Punës dhe Transfereve në Ministrinë e Drejtësisë”, thuhet në njoftimin e Ministrisë së Drejtësisë.
Në njoftim, po ashtu thuhet se ministrja Haxhiu ka theksuar rëndësinë e pritjes dhe trajtimit të mirë të qytetarëve që u ofrohen shërbime sociale, duke kërkuar rritjen e standardeve profesionale të zyrtarëve të këtyre qendrave, por edhe duke shprehur gatishmërinë në adresimin e rekomandimeve dhe gjetjen e zgjidhjeve për fuqizimin e Qendrave për Punë Sociale.