Ushtruesja e detyrës së presidentes së vendit Albulena Haxhiu, ka bërë të ditur se ka zhvilluar një vizitë në Agjencinë e Kosovës për Inteligjencë (AKI), ku është pritur nga drejtori i Agjencisë, Petrit Ajeti, si dhe nga zyrtarë të tjerë.
Përmes një postimi në Facebook, Haxhiu ka thënë se gjatë vizitës është njohur nga afër me punën, organizimin dhe prioritetet e këtij institucioni.
“Sot vizitova Agjencinë e Kosovës për Inteligjencë (AKI), ku u prita nga drejtori, z. Petrit Ajeti, dhe zyrtarë të tjerë të Agjencisë. Nga afër u njoha me punën, organizimin dhe prioritetet e këtij institucioni kyç për sigurinë e Republikës së Kosovës”, ka shkruar Haxhiu.
Ajo ka shprehur gjithashtu vlerësim për punën e zyrtarëve të AKI-së, duke theksuar rëndësinë e forcimit të kapaciteteve të institucionit dhe të bashkëpunimit ndërinstitucional për garantimin e sigurisë së vendit.
“Shpreha vlerësimin për profesionalizmin dhe përkushtimin e zyrtarëve të AKI-së në mbrojtje të sigurisë dhe interesave shtetërore. Fuqizimi i kapaciteteve të saj dhe bashkëpunimi ndërinstitucional mbeten thelbësore për një Republikë të sigurt dhe të përgatitur për sfidat e së ardhmes”, ka deklaruar ajo.