Ish-kryeministri i Kosovës dhe njëherit deputet nga radhët e Lidhjes Demokratike të Kosovës (LDK), Avdullah Hoti, ka shkruar se Marrëveshja që ai kishte nënshkruar në Uashington, kishte qenë arsyeja pse ai ishte sharë e fyer nga opozita e atëhershme.
Ai, në faqen e tij zyrtare në Facebook, ka thënë se popullistët që e kundërshtuan këtë marrëveshje, sot janë në pushtet e po i bartin pasojat.
“Janë thënë shumë të pavërteta për Marrëveshjen e Uashingtonit nga opozita e atëhershme. Cilësimi i një marrëveshje që është arritur në Shtëpinë e Bardhë si e dëmshme dhe e rrezikshme për Kosovën, ishte gabim strategjik. Pasojat po i bartin çdo ditë. Unë personalisht jam fyer e sharë nga opozita e atëhershme. Ata popullistë sot janë në Kuvend, Qeveri dhe Presidencë. Sot, është e qartë se ato epitete i meritojnë ata, jo unë. Sot është e qartë se ata persona: ose janë mashtrues, ose janë naivë në marrëdhëniet ndërkombëtare, ose kanë tjetër orientim për Kosovën. E di secili prej tyre se në cilën kategori bien. E di edhe unë”, ka shkruar Hoti.
Hoti gjithashtu ka thënë se pas kësaj marrëveshjeje është biseduar intensivisht me partnerët që të vendoset dialogu në agjendë të qartë, e cila çon në njohje reciproke.