Deputeti i Kuvendit të Kosovës, Fatmir Humolli, ka thënë se sulmi terrorist serb në Banjskë, ka pasur për qëllim vrasjen e civilëve serbë, e pastaj të i lihej faji shqiptarëve të Kosovës.
Në emisionin “Five”, ai tha se kjo u parandalua nga sjellja profesionale e Policisë së Kosovës.
“Ky akt terrorist ishte që të bëjë krim ndaj popullatës së tyre, që të ankohen pastaj se atë po e bëjnë shqiptarët, misioni i tyre ka qenë i tillë. Sjellja profesionale e policisë, dhe shteti duke e kuptuar logjikën si funksionon shteti serb nuk ia ka dhënë këtë kartë në dorë. Lufta e popullit tonë nuk është kundër popullit serb, por ka qenë kundër hegjemonisë serbe, kjo kulturë është e ngulitur edhe te policia e Kosovës dhe FSK, ata nuk veprojnë nga frika por nga arsyeja”, tha ai.
Humolli foli edhe për dialogun ku tha se me Serbinë nuk duhet të bisedohet për çështjet e brendshme të Kosovës.
Ai tha se Kosova nuk ka platformë të qartë platformën e dialogut, derisa tha se situata e fundit e krijuar tregon se duhet të stopohet dialogu.
“Kemi pranu me bisedu me Serbinë për Kosovën, në momentin kur e kemi fut si hisedarë Serbinë në Kosovë, janë trimëru këto struktura kriminale. Me Serbinë duhet me bisedu me i kthy të pagjeturit në Kosovë, diplomatët e dinë që Serbia e din, por nuk i bëjnë presion”, tha ai.
“Kjo situatë është dashur ta stopoj çdo bisedë, me BE-në dhe Serbinë deri sa të formohet një platformë e përbashkët me Shqipërinë”, vijoi ai.
Humolli foli edhe për deklaratën e kryeministrit të Shqipërisë Edi Rama, i cili tha se KFOR-i duhet ta marrë nën kontroll veriun.
“KFOR-i ka kontroll në tërë Kosovën, Edi Ramën nuk e kanë informu me kohë se KFOR-i e ka kontrollën në Kosovë”, tha Humolli.