Një 40-vjeçar nga Kosova, i shpallur në kërkim ndërkombëtar nga autoritetet finlandeze, është arrestuar nga Policia shqiptare në pikën kufitare të Morinës në hyrje të territorit të Republikës së Shqipërisë.
Sipas njoftimit nga Policia e Shtetit, shërbimet e Policisë Kufitare të Morinës, në bashkëpunim me strukturat e DVP Kukës, identifikuan dhe ndaluan shtetasin Sh. H., 40 vjeç, banues në Kosovë. Gjatë verifikimeve, u konfirmua se ndaj tij ishte lëshuar një urdhër arresti nga Prokuroria e Distriktit Jugor të Helsinkit, në Finlandë, për veprën penale “Trafikimi i lëndëve narkotike”.
“I shpallur në kërkim ndërkombëtar nga autoritetet finlandeze, për trafikim të lëndëve narkotike, kapet nga shërbimet e Policisë Kufitare, në hyrje të RSh-së, 40-vjeçari.
Si rezultat i kontrolleve dhe verifikimeve të imtësishme në hyrje/dalje, me objektiva goditjen e paligjshmërive në kufi, si dhe ndalimin e shtetasve të shpallur në kërkim, të cilët tentojnë të lëvizin ilegalisht për t’iu shmangur përgjegjësisë penale, shërbimet e Policisë Kufitare të Morinës, në bashkëpunim me shërbimet e DVP Kukës, kapën në hyrje të RSh-së dhe arrestuan me qëllim ekstradimin, shtetasin kosovar:
Sh. H., 40 vjeç, banues në Kosovë.
Nga verifikimet e kryera dhe nga informacioni i shkëmbyer me Interpol Tiranën, rezultoi se ky shtetas ishte shpallur në kërkim ndërkombëtar, pasi Prokuroria e Distriktit Jugor Helsinki ka caktuar ndaj tij masën e sigurisë “Arrest në burg”, për veprën penale “Trafikimi i lëndëve narkotike”.
Interpol Tirana vijon procedurat për ekstradimin e 40-vjeçarit në Finlandë”, thuhet në njoftim.