Kryetari i Partisë Demokratike të Kosovës (PDK), Memli Krasniqi ka përkujtuar sot 23 vjetorin e eksodit shqiptar.
I pari i PDK-së, përmes një postimi në Facebook ka thënë se është jetike që kjo histori e dhembjes në përpjekje për liri, të mos harrohet asnjëherë.
“Sot shënojmë Ditën e Eksodit Shqiptar, në kujtim të mbi një milion shqiptarëve të Kosovës që ishin detyruar dhunshëm të largoheshin nga shtëpitë e tyre dhe vendi ynë 23 vite më parë”, ka shkruar ai.
Ai iu ka shprehur mirënjohje të thellë gjithë shqiptarëve në rajon, Shqipëri, Maqedoni e Mal të Zi, që i kishin hapur zemrat dhe dyert e shtëpive të tyre për të strehuar refugjatët nga Kosova.
“Kosova nuk do të harrojë asnjëherë”, ka shtuar Krasniqi.
Të shtunën e 16 prillit janë bërë 23 vjet nga eksodi i shqiptarëve nga Kosova.
Me mijëra shqiptarë, gjatë luftës së vitit 1998-1999, u detyruan nga forcat serbe të shpërnguleshin në Shqipëri dhe Maqedoni.
Përveç eksodit për në Shqipëri e Maqedoni, shumë shqiptarë të tjerë kaluan kufirin edhe me Malin e Zi, ndërsa të tjerë ishin zhvendosur nga shtëpitë e tyre për t’u strehuar në malet e Kosovës.
Në mesin e të shpërngulurve kishte, fëmijë, gra, burra e qindra të moshuar.