Në orët e para të mëngjesit, dy persona kanë tentuar që ta blindojnë derën kryesore të hyrjes në objektin e komunës së Zveçanit, duke nisur saldimin e saj.
Intervenimi i pjesëtarëve të Policisë e ndaloi këtë veprim, të cilët edhe i arrestuan dy të përfshirët. Ky nuk është incidenti i parë në kohën kur pritet të caktohet data e betimit të kryetarëve të rinj të katër komunave veriore.
Në lidhje me këtë, eksperti i sigurisë, Nuredin Ibishi, në emisionin “FIVE” ka thënë se tensionet e dirigjuara nga Beogradi do të vazhdojnë dhe se vetëm do të përshkallëzohen sado që afrohet konstituimi i asambleve dhe betimi i kryetarëve të rinj.
“Tensionet e dirigjuara nga Beogradi do të vazhdojnë dhe se vetëm do të përshkallëzohen sado që afrohet konstituimi i asambleve dhe betimi i kryetarëve të rinj. Serbia po mundohet ta përshkallëzojë situatën dhe të fitojë benefite, Asociacioni është pika e parë e përqendrimit të Vuçiqit”, ka thënë Ibishi.
Ai ka thënë se pengimi i betimit të kryetarëve të rinj në katër komunat veriore lidhet pikërisht me çështjen e Asociacionit të Komunave me shumicë serbe.
“Në këtë situatë do të mundohen të përqendrojnë vëmendjen te problemet e brendshme. Pasi edhe Perëndimi po kërkon dhe ShBA-ja që të jepet një formë e draftit, atëherë edhe Serbia mundohet të shfrytëzojë këtë situatë”.