Inspektorati Policor i Kosovës (IPK), ka rekomanduar suspendimin e katër zyrtarëve policorë nga stacioni i Suharekës, përfshirë një toger, një rreshter dhe dy zyrtarë të tjerë.
Sipas njoftimit, ky veprim erdhi pas nisjes së hetimeve nga hetuesit e IPK-së, të cilët vepruan sipas autorizimit të Prokurorisë Themelore të Prizrenit, për shkak të moszbatimit nga ana e këtyre zyrtarëve të një aktvendimi të Gjykatës Themelore të Prizrenit.
Në aktvendimin e Gjykatës, ishte urdhëruar ndërprerja e arrestit shtëpiak për dy të pandehurit dhe zëvendësimi i tij me paraburgim.
Njëri nga të dyshuarit është akuzuar për vrasje të rëndë dhe mbajtje të paautorizuar të armëve, ndërsa tjetri për ndihmë në kryerjen e veprës penale.
IPK njofton se hetimet po zhvillohen në koordinim me Prokurorinë Themelore të Prizrenit, duke dyshuar për veprat penale “Keqpërdorimi i pozitës apo të autoritetit zyrtar” dhe “Mos-ekzekutimi i vendimeve gjyqësore.”