Visar Islami, nënkryetar i parë i Këshillit të Prindërve, ka treguar se sot anëtarët e Këshillit të Prindërve kanë mbajtur mbledhje, ku temë diskutimi ka qenë sigurimi i librave për fillimin e vitit të ri shkollor.
I ftuar në emisionin “Five”, në RTV Dukagjini, Islami thotë se vendimi i Ministrisë ende nuk është i prerë, por është vetëm ide, dhe se sipas tij, ai pritet të merret nesër ose pasnesër.
“Ky nuk është një vendim i prerë, dmth është ende si ide, ndërkaq vendimi besoj që do të merret nesër ose pasnesër”, është shprehur Islami.
Islami thotë se sa më shpejt duhet të merret vendimi, që Këshilli i Prindërve dhe institucionet ta kenë të qartë se çfarë duhet të bëjnë, sepse sipas tij, do të ketë vonesa në fillimin e vitit të ri shkollor, “deshtëm apo s’deshtëm”.
Islami tregon se si Këshill i Prindërve kanë rekomanduar që prindërit të shkojnë të marrin vetë librat në librari ose shtëpi botuese e pastaj obligimet t’i kryej Ministria.
Por, sipas tij, nga diskutimi që këshilli ka pasur, forma e vetme del të jetë ajo e propozuar nga Ministria e Arsimit, e që është rimbursimi.
“Ne si Këshill kemi dhënë një rekomandim që e kemi pasur një mundësi që prindërit të shkojnë të marrin vetë librat në librari ose në shtepi botuese dhe obligimet t’i kryej Ministria. Forma e vetme nga ajo qe diskutuam po del të jetë rimbursimi”, ka thënë Islami.
Ministria e Arsimit, Shkencës dhe Teknologjisë, ditë më parë ka vendosur që të mos sigurojë tekstet për filloristët, por prindërit t’i sigurojnë për fëmijët e tyre dhe pastaj Ministria t’i rimbursojë.