Tenisti italian Jannik Sinner ka shtuar një tjetër trofe në vitin e tij të shkëlqyer, duke triumfuar në finalen e turneut të Vjenës pas një përballjeje të fortë ndaj gjermanit Alex Zverev.
Në një ndeshje plot emocione, 24-vjeçari arriti të përmbysë disavantazhin fillestar, duke fituar me rezultatin 2-1 në sete (3-6, 6-3, 7-5). Zverev e nisi më mirë takimin, duke fituar setin e parë me lojë të fortë dhe shërbime të sakta, por Sinner reagoi fuqishëm në setin e dytë, duke barazuar shifrat dhe duke marrë kontrollin e ritmit të lojës.
Seti i tretë dhe vendimtar u karakterizua nga intensitet i lartë dhe pikë të gjata, por në fund ishte italiani ai që ruajti qetësinë dhe siguroi trofeun e katërt sezonal.
“Ishte një fillim shumë i vështirë në këtë finale për mua. Kisha disa mundësi në setin e parë, por nuk i shfrytëzova. Ai po shërbente shumë mirë, megjithatë unë u përpoqa të qëndroja i fokusuar dhe të luaja tenisin tim më të mirë në momentet vendimtare,” u shpreh Sinner pas ndeshjes.
Me këtë fitore, Sinner forcon pozitën e tij si numri dy në renditjen botërore, pas spanjollit Carlos Alcaraz, duke vulosur një sezon që konfirmon ngritjen e tij në elitën e tenisit botëror.