Japonia po kërkon të blejë raketa lundrimi të zhvilluara nga SHBA, ndërsa kërkon të kundërshtojë kërcënimet në rritje rajonale, duke përfshirë edhe Korenë e Veriut, ka thënë qeveria, shkruan Theguardian.
Gazeta e përditshme Yomiuri Shimbun, ishte ndër ato që raportuan të premten se Tokio ka qenë në fazat përfundimtare të diskutimeve me qeverinë amerikane mbi blerjen e raketave me rreze të mesme veprimi, të cilat lëshohen nga deti.
Gazeta ka shkruar, se Gadishulli Korean do të jetë brenda rrezes së raketave, në varësi të zonës së lëshimit, duke cituar burime të paidentifikuara qeveritare.
I pyetur për raportet, zëdhënësi i lartë i qeverisë Hirokazu Matsuno ka thënë se ministrat po “studionin” mundësinë, por asgjë nuk ishte vendosur.
Disa orë pas komenteve të Matsuno, Koreja e Veriut lëshoi një tjetër “raketë balistike të paspecifikuar” në brigjet e saj lindore, ka thënë ushtria e Seulit.
Nisja, në një kohë të frikës në rritje se Koreja e Veriut po përgatitet për testin e saj të parë bërthamor që nga viti 2017, ishte i fundit në një vit rekord të testeve raketore.
Zëvendësministrat e jashtëm të Japonisë, Koresë së Jugut dhe Shteteve të Bashkuara kanë paralajmëruar në fillim të kësaj jave se një test bërthamor i Koresë së Veriut do të kishte një “përgjigje të fortë të paprecedentë”.
Japonia po kalon një ndryshim dramatik në qëndrimin e saj të pasluftës ndaj mbrojtjes. Neni nëntë i kushtetutës së vendit, i shkruar nga forcat pushtuese amerikane pas Luftës së Dytë Botërore, heq dorë nga lufta dhe e ndalon vendin të përdorë forcën për të zgjidhur mosmarrëveshjet ndërkombëtare. Ushtria e saj është e kufizuar në një rol rreptësisht mbrojtës.
Shpenzimet e mbrojtjes së Japonisë janë rritur pothuajse çdo vit gjatë dekadës së kaluar, por presioni është rritur për financim më të madh pas pushtimit rus të Ukrainës dhe presionit në rritje të Kinës ndaj Tajvanit.