Dy aktoret fituese të “Oscar-it”, Angelina Jolie dhe Halle Berry, do t’i bashkojnë forcat për projektin e ardhshëm të zhanrit triler dhe aksion, “Maude v Maude”, kjo pasi “Warner Bros” i ka siguruar të drejtat autoriale të realizimit të filmit, pas një lufte ofertash me shumë studio.
Sipas portalit “Deadline”, Jolie dhe Berry po ashtu shërbejnë si producente të filmit, krahas Holly Jeter, Jeff Kirschenbaum dhe Joe Roth.
Roseanne Liang vjen në rolin e regjisores kurse për skenarin është përkujdesur, Scott Mosier.
Sipas disa burimeve të afërta, filmi do të ngjajë me hitet e arkave filmike “James Bond” dhe “Jason Bourne”, por detaje të sakta rreth temës që e trajton nuk janë zbuluar ende.
Halle Berry aktualisht është duke punuar me producenten e njohur, Holly Jeter, në filmin e ri me titull, “Never Let Go”.
Ajo e ka rolin protagonist në projektin e studios “Lionsgate”, i cili e rrëfen historinë e një nëne dhe djemve të saj binjakë, të cilët për vite me radhë janë torturuar nga një fantazmë e keqe.
Por, ata qëndrojnë të bashkuar dhe të vendosur që kurrë të mos e ndryshojnë lidhjen mes familjes së tyre. Por, kur njëri nga djemtë fillon të dyshojë nëse fantazma që i përndjekë është e vërtetë, situata e familjes komplikohet duke shkaktuar një luftë të tmerrshme për mbijetesë.
Ndërsa, një prej projekteve të ardhshëm të Joliet do të jetë biografi dhe e sjell atë në rolin e këngëtares së operës, Maria Callas.
Në filmin me titull “Maria” dhe me regji të Pablo Larrain, aktorja 47-vjeçare do të portretizojë sopranon e njohur greke me origjinë amerikane.
Ai bazohet në ngjarje të vërteta dhe e ekranizon historinë e trazuar, të bukur dhe tragjike të këngëtares së njohur të operës, gjatë ditëve të saj të fundit në Parisin e viteve 1970.