Deputeti i vetëm shqiptar në Parlamentin e Serbisë, Shaip Kamberi, ka thënë se shqiptarët në Luginën e Preshevës po vazhdojnë të përballen me pushtetin serb, i cili, sipas tij, nuk e ka ndryshuar politikën ndaj shqiptarëve atje.
Kamberi këtë e ka thënë në emisionin “Radar” me Edita Dolin në Radio Dukagjini.
Ai ka thënë se në Luginën e Preshevës është duke ndodhur spastrim etnik, dukes shtuar se mungon trysnia e BE-së ndaj Serbisë.
“Spastrimi etnik ka filluar në vitin 1999. Zbrazja e vendbanimeve në atë kohë që ishin të banuara kryekëput nga shqiptarët. Metoda tjetër e spastrimit është mosnjohja e diplomave, 15 gjenerata kanë përfunduar studimet në Kosovë e atyre nuk iu njihet ende diploma. Dhe, metoda tjetër e spastrimit etnik është pasivizimi i adresave, ku në Medvegjë është arritur qëllimi ngase mbi 4 mijë shqiptarë kanë humbur vendbanimin”, ka thënë deputeti shqiptar në Parlamentin serb.
Kamberi ka thënë se në Luginë të Preshevës ka fushatë të egër kundër produkteve shqiptare nga ana e serbëve, derisa ka rrëfyer se kërcënimet që i merr vazhdimisht nuk e mposhtin.
Ai ka deklaruar se konfrontimi i tij me pushtetin serb po i bën shqiptarët atje që të besojnë se po i dëmton, por në afatgjatë, ai beson se kjo është rruga e duhur e raportit me udhëheqjen serbe.