Katër zyrtarë të Federatës së Futbollit të Kosovës dyshohen për zhvatje, keqpërdorim të pasurisë dhe interesave të FFK-së, kështu ka njoftuar të martën Policia e Kosovës, pasi ka bërë të ditur se ka intervistuar katër të dyshuarit.
Siç ka njoftuar policia, personat e dyshuar “dyshohet se kanë keqpërdor autorizimet e tyre me qëllim që personit të huaj t’i sjellin dobi pasurore të kundërligjshme duke lejuar pagesën e faturës për blerjen e një veture”.
“Andaj si rezultat i hetimeve të realizuara nga Njësiti Rajonal për Hetimin e Krimeve Ekonomike dhe Korrupsionit-Prishtinë, dyshohet se vetura e lartcekur në mënyrë të kundërligjshme është përvetësuar dhe regjistruar në emër të personit privat në FKK, andaj e njëjta është sekuestruar”, thuhet në njoftimin e policisë.
Sipas policisë, ata dyshohen për veprat penale të “keqpërdorimit të besimit” dhe “shmangie nga tatimi”.
Prandaj, në konsultim dhe koordinim me prokurorin kompetent nga Prokuroria Themelore në Prishtinë, të dyshuarit pas intervistimit janë liruar në procedurë të rregullt.