Bordi i Drejtorëve të Korporatës Energjetike të Kosovës ka njoftuar se ka liruar nga detyra Nagip Krasniqin dhe ka njoftuar se konkursi për pozitën e kryeshefit ekzekutiv do të hapet ditëve në vijim.
Sipas njoftimit, gjatë mbledhjes së mbajtur dje janë marrë dy vendime, ku njëri prej tyre ishte lirimi nga detyra i tashmë ish-kryeshefit ekzekutivit, Nagip Krasniqi.
“Bordi i Drejtorëve të KEK sh.a. ka marrë vendim për të liruar nga detyra tashmë ish Kryeshefin Ekzekutiv, z. Nagip Krasniqi”, thuhet në njoftim.
Bordi i Drejtorëve të KEK-ut ka vendosur që në ditët në vijim të inicohen edhe procedurat për shpalljen publike të konkursit për pozitën e kryeshefit ekzekutiv të ri të Korporatës Energjetike të Kosovës.
Krasniqi dyshohet për keqpërdorim të detyrës zyrtare e ushtrim të ndikimit.
Ai u arrestua më 19 prill të vitit 2023 dhe më 25 prill 2023 është pezulluar nga detyra e kryeshefit ekzekutiv të KEK-ut.
Ndërsa në shtator ai ishte liruar nga paraburgimi, por të njëjtit i ishte ndaluar t’i afrohej objektit të KEK-ut në 50 metra.